युरोपात कोरोनाचा डेल्टा व्हेरियंटनं हाहा:कार माजवला असतानाच आता ओमिक्रॉननं धास्ती वाढवलीय. बेल्जियममध्ये कोरोनाबाधितांचे प्रमाण वाढल्यानं हॉस्पिटलमध्ये बेड मिळणंही अवघड झालंय. कोरोनाचा संसर्ग मुलांमध्ये होऊ नये यासाठी नवे निर्बंध जारी करण्यात आलेत. यापुढे सहा वर्षांवरील सर्वच मुलांना मास्क घालणं बंधनकारक करण्यात आलंय. २० डिसेंबरपासून बालवाडी आणि प्राथमिक शाळा बंद करण्यात आल्या आहेत. माध्यमिक शाळाही एकदिवस आड सुरू राहणार आहेत. कोरोनाचा संसर्ग रोखण्यासाठी युरोपमधील ऑस्ट्रिया या देशात पहिल्यांदा पूर्ण लॉकडाऊन आला. तर नेदरलँडमध्ये अशत: लॉकडाऊन लावण्यात आला. आता लॉकडाऊनच्या विरोधात नागरिक रस्त्यावर उतरले आहेत. सार्वजनिक ठिकाणी प्रवेश करण्यासाठी लसीकरण बंधनकारक केल्यानं स्पेनमधील नागरिक संतप्त झालेत. इटलीत कोरोनाचा संसर्ग वाढत असल्यानं नागरिकांना मास्क बंधनकारक करण्यात आलंय. नागरिकांनी मास्क घातलं की नाही याबाबत तपासणी करण्यात येत आहे. तर ब्रिटनमध्ये अवघ्या काही दिवसांत ओमिक्रॉनबाधितांची संख्या १६० वर पोहचलीय. परदेशातून येणाऱ्या सर्वच प्रवाशांना कोरोना चाचणी आणि विलगीकरण बंधनकारक करण्यात आलंय. परदेशातून आलेल्या प्रवाशांना विलगीकरणासाठी हॉटेलही मिळत नसल्यानं गोंधळाची परिस्थिती निर्माण झालीय. जर्मनीमध्ये गेल्या २४ तासांत कोरोनामुळे ३७८ रुग्णांचा मृत्यू झालाय. कोरोनाचा संसर्ग रोखण्यासाठी लसीकरण बंधनकारक करण्यात आलंय. लसीकरण न झालेल्या नागरिकांना सार्वजनिक ठिकाणी प्रवेशबंदी आहे. या निर्बंधाचं स्वागत जर्मनमधील नागरिकांनी केलंय. जास्तीत जास्त नागरिकांनी कोरोना प्रतिबंधात्मक लस घ्यावी असं आवाहनही मावळत्या चॉन्सलर अँजिला मर्केल यांनी केलंय. जर्मनीमध्ये निर्बंधाचं स्वागत होत असताना ऑस्ट्रेलियामध्ये लससमर्थक आणि विरोधकांनी रॅली काढत आमने-सामने आलेत.
रशियामध्येही कोरोनाचा विस्फोट झालाय. गेल्या २४ तासांत कोरोनाचे ३२,९७४ रुग्ण आढळून आले आहेत. तर १,२१५ कोरोनाबळी गेले आहेत. कोरोनाचा संसर्ग रोखण्यासाठी आंतरराष्ट्रीय प्रवाशांना कोरोना चाचणी आणि १४ दिवसांचं विलगीकरण बंधनकारक करण्यात आलंय. चीनमध्येही कोरोनाचा संसर्ग वाढत आहे. कोरोना व्हायरसचा नवा व्हेरिअंट ओमिक्रॉनची जगभरातच धास्ती आहे. अशा या भीतीच्या वातावरणात जागतिक आरोग्य संघटनेने मोठा दिलासा दिला आहे. कोरोनाच्या नव्या व्हेरिअंटचा ४० देशांत प्रसार झाला असला तरीही या व्हेरिअंटमुळे अद्याप एकही मृत्यू झालेला नाही, असं जागतिक आरोग्य संघटनेनं म्हटंलय.
देशात ओमिक्रॉनचा धोका दिवसेंदिवस वाढत आहे. सोमवार पर्यंत २१ जण ओमिक्रॉन बाधित आढळले आहेत. आधी कर्नाटक नंतर महाराष्ट्र त्या पाठोपाठ दिल्ली आणि आता जयपूरमध्ये देखील ओमिक्रॉन पोहोचला आहे. महाराष्ट्रात ओमिक्रॉनचे रुग्ण झपाट्यानं वाढत असल्यानं आरोग्य विभाग अलर्ट मोडवर आला आहे. त्याचबरोबर राज्य सरकारची चिंताही वाढली आहे. राज्यात बघता बघता रविवार सपर्यंत ओमिक्रॉनच्या रुग्णांची सख्या ८ वर गेली आहे. त्यामुळे प्रसासनाच्या वतीने काय खबरदारी घेता येईल? काय उपाययोजना करता येतील? यासाठी धावपळ सुरू आहे. कल्याण-डोंबिवलीत ओमिक्रॉनचा राज्यातला पहिला रुग्ण आढळून आला, त्यानंतर पुणे आणि पिंपरी चिंचवडमध्ये ओमिक्रॉनचे रुग्ण आढळले आहेत. पिंपरी चिंचवडमध्ये ६ ओमिक्रॉनचे नवे रुग्ण आढळल्याने प्रशासन खडबडून कामाला लागले आहे. तर पुण्यात एक ओमिक्रॉनचा रुग्ण आढळून आला आहे. त्यामुळे पुणे विभागाची चिंताही मोठ्या प्रमाणात वाढली आहे. नव्याने आढळून आलेल्या रुग्णांनाही सौम्य लक्षणे आहेत, सर्व रुग्णांची प्रकृती स्थिर असल्यानं थोडासा प्राथमिक दिलासा मिळाला आहे. मात्र लस घेतलेल्या रुग्णांनाही ओमिक्रॉन होत असल्याने प्रशासनाचे धाबे दणाणले आहेत. महाराष्ट्रात एवढी मोठी रुग्णवाढ झाल्याने देशाची चिंताही वाढली आहे. त्यामुळे देशपातळीवरही काही मोठे निर्णय घेतले जाण्याची शक्यता आहे. तर महाराष्ट्रातही निर्बंध आणखी कडक केले जाण्याची शक्यता आहे. संसर्गक्षमता खूप जास्त असल्याने काेराेनाचा ओमिक्राॅन व्हेरिएंट डेल्टाची जागा घेऊ शकताे. येणाऱ्या काळात ओमिक्राॅनचेच रुग्ण माेठ्या प्रमाणात आढळतील. मात्र, वेगळ्या लसीची कदाचित गरज भासणार नाही, असे जागतिक आराेग्य संघटनेच्या मुख्य शास्त्रज्ञ डाॅ. साैम्या स्वामिनाथन यांनी सांगितले.
-सुरेश मंत्री.
टिप्पण्या
टिप्पणी पोस्ट करा